Դիցաբանական անուններ եւ բացատրութիւններ (Մաս Ա.)

(Achates) Ակատէս: Հաւատարիմ բարեկամ Ենէասի, Վերդիլիոսի Ենէականին մէջ: Իր անունը կը գործածուի ներկայիս ակնարկելու համար մէկուն, որ միշտ կ'ընկերանայ ուրիշի մը` առանց երբեք բաժնուելու անկէ:

(Acheron) Ախերոն: Որդի երկնի եւ երկրի. Արամազդ զայն փոխեց դժոխային գետի մը, ուրկէ ոչ ոք կրնար անցնիլ երկու անգամ:

(Achilles) Աքիլլէս: Իլիական նշանաւոր հերոսներէն մին: Իր մայրը, Թետես, զայն լուացած էր Ստիւքս գետին մէջ եւ անոր ամբողջ մարմինը` բացի կրունկէն` դարձուցած անխոցելի: Աքիլլէս վիրաւորուեցաւ իր կրունկէն Տրովադայի պատերազմին մէջ ու մեռաւ: «Աքիլլէսի Կրունկ» բացատրութիւնը, կը գործածուի գրականութեան մէջ:

(Adonis) Ատոնիս: Գեղեցկատեսիլ, պատանի մը, զոր գորովագին կը սիրէր Աստղիկ չաստուածուհին: Վարազ մը սպաննած ըլլալով զԱդոնիս, Աստղիկ փոխեց զայն անիմոն ծաղիկին:

(Aeneas) Ենէաս: Մին Ենէականի հերոսներէն, որդի Անքիսէսի եւ Աստղկան:

(Aesculapius) Ասկղեպիոս, (Էսկուլապ): աստուած բժշկութեան եւ որդի Ապողոնի, կայծակնահար սպաննուեցաւ Արամազդէն, իր հայրը զայն փոխեց համաստեղութեան մը:

(Agamemnon) Ագամեմնոն: Հրամանատար Յունական բանակին Տրովադայի պատերազմին ատեն:

(Ajax) Էաս: Որդի Տեղամոնի եւ Աքիլլէսէն ետքը ամենաքաջ մարտիկը Տրովադայի պատերազմին մէջ:

(Albion) Ալբիոն: Նեպտոնի որդին, որ թագաւորութիւն մը հիմնեց Բրիտանիոյ մէջ: Այս աւանդութեան շնորհիւ Անգլիա կը կոչուի նաեւ Ալբիոն (Հպարտ Ալբիոն):

(Alceste) Աղկեստէ: Դուստր Պեղիասի եւ կին Ադմիտի, որուն սիրոյն զոհեց իր անձը, բայց Հերակլէս ազատեց զայն դժոխքէն եւ դարձուց իւր ամուսնոյն:

ՄԱՍ Ա.-